රූපවාහිනීට පඩි ගෙවන්න භාණ්ඩාගාරයෙන් සල්ලි ඉල්ලයි

රූපවාහිනී සංස්ථාවේ සේවකයන්ට මේ වසරේ වැටුප් ගෙවීම සඳහා මාසිකව රුපියල් 48,000,000 ක් මහා භාණ්ඩාගාරයෙන් ලබාදෙන්නැයි තොරතුරු හා ජනමාධ්‍ය අමාත්‍යාංශය ඉල්ලීමක් කර ඇත.

 

ඒ සඳහා අනුමැතිය ඉල්ලා තොරතුරු හා ජනමාධ්‍ය ඇමැති සහ උසස් අධ්‍යාපන ඇමැති බන්දුල ගුණවර්ධන මහතා කැබිනට් මණ්ඩලයට සංදේශයක් ඉදිරිපත් කර ඇති බව වාර්තා වේ.

 

රූපවාහිනි සංස්ථාව මුල්‍යමය අර්බුදයකට මුහුණ දී ඇති බැවින් රජයේ වැඩසටහන් ප්‍රචාරය කිරිම වෙනුවෙන් නොමිලේ දෙන ගුවන් කාලයේ වටිනාකම ද සැළකිල්ලට ගෙන මෙම මුදල ලබා දෙන්නැයි අමාත්‍යාංශය ඉල්ලා ඇත.

 

රූපවාහිනි සංස්ථෘවේ සේවකයන් ගණන 930 ක් පමණ වන අතර ඔවුනට වැටුප් ගෙවීමට මාසිකව රුපියල් කෝටි 5 ක් වැයවනු ඇතැයි පැවසේ.

 

මීට අමතරව අනෙකුත් දීමනා ආදිය සඳහා තවත් රුපියල් කෝටි 4 ක පමණ වැය වන බවද දැනගන්නට ලැබී ඇත.

 

රූපවාහිනි සංස්ථාව 2017 වසරේදී රුපියල් කෝටි 40 ක පමණ 2018 වසරේදී රුපියල් කෝටි 44 ක පමණ ද වටිනා ගුවන් කාලයක් රජයේ වැඩසටහන විකාශය සඳහා කිසිදු අයකිරිමකින් හෝ අනුග්‍රාහකත්වයකින් තොරව ලබාදී ඇතැයි ද අගමැතිවරයා කැබිනට් මණ්ඩලයට දැනුම් දී ඇත.