රාජිතට මහාධිකරණයෙන් නොතිසි නිකුත් කරයි
සුදු වෑන් වලින් පුද්ගලයන් පැහැර ගැනීමක් සිදු වූ බවට මාධ්‍ය සාකච්ඡාවක් පැවැත්වීමේ සිද්ධියට අදාළව හිටපු සෞඛ්‍ය අමාත්‍ය රාජිත සේනාරත්නට කොළඹ ප්‍රධාන මහේස්ත්‍රාත් අධිකරණය විසින් ඇප ප්‍රදානය කිරීම අභියෝගයට ලක්කරමින් ගොනු කළ ප්‍රතිශෝධන පෙත්සම ජනවාරි මස 17 දා කැදවීමට කොළඹ මහාධිකරණය අද (13) දින නියම කළා.
ඒ අනුව මෙම පෙත්සමේ වග උත්තරකරුවකු ලෙසට නම් කර ඇති හිටපු අමාත්‍ය රාජිත සේනාරත්නට මීලඟ දින අධිකරණයේ පෙනී සිටීමට කොළඹ මහාධිකරණය අද නොතීසි නිකුත් කරනු ලැබුවා.
පසුගිය දෙසැම්බර් මස 30 දා රාජිත සේනාරත්න ඇප මත මුදාහැරීමට කොළඹ ප්‍රධාන මහේස්ත්‍රාත් අධිකරණය නිකුත් කළ නියෝගය දෝෂ සහිත බව පවසමින් නීතිපතිවරයා විසින් මෙම ප්‍රතිශෝධන පෙත්සමක් ගොනු කර තිබෙනවා.
ඒ අනුව කොළඹ ප්‍රධාන මහේස්ත්‍රාත් අධිකරණය විසින් හිටපු අමාත්‍ය රාජිත සේනාරත්නව ඇප මත මුදාහැරීමට කළ නියෝගය සංශෝධනය කොට ඔහු රක්ෂිත බන්ධනාගාර ගත කරන ලෙසට නීතිපතිවරයා ඉල්ලා තිබෙනවා.
1064 Views
Comments