අභියෝග ජයගත හැකි අධ්‍යාපන ක්‍රමයක් ගොඩනගන බවට අධ්‍යාපන ඇමතිගෙන් ප්‍රතිඥාවක්

21 වැනි සියවසේ අභියෝගවලට මුහුණ දීම සඳහා අපගේ අධ්‍යාපන ක්‍රමය පරිවර්තනය කිරීමට කාලය එළඹ ඇති බව අධ්‍යාපන අමාත්‍ය සුසිල් ප්‍රේමජයන්ත් මහතා පවසා තිබේ.

 

 

මැයි 12, 13 සහ 14 යන දිනවල බණ්ඩාරනායක ජාත්‍යන්තර අනුස්මරණ සම්මන්ත්‍රණ ශාලාවේ (BMICH) පැවැත්වීමට නියමිත 'Sri Lanka Skills Expo 2023' මාධ්‍ය හමුවක් අමතමින් අමාත්‍යවරයා මේ බව සඳහන් කර ඇත.

 

 

රට මේ වනවිට හතරවන කාර්මික විප්ලවයේ සිටින බවත් ඉතා ඉක්මනින් අප පස්වන කාර්මික විප්ලවයටද පා තබනු ඇති බවත් ඔහු පවසනු ලැබීය.

 

 

නමුත් හතරවැනි කාර්මික විප්ලවයේදීවත් අභියෝග භාර ගැනීමට අප සූදානම්ද යන්න ගැටළුවක් බැවින් ඒ වෙනුවෙන් අධ්‍යාපන ක්ෂේත්‍රයේ සිදු විය යුතු සංවර්ධන කටයුතු කිහිපයක් සඳහා අමාත්‍යාංශය පියවර ගනිමින් සිටින බවත් අධ්‍යාපන අමාත්‍යවරයා වැඩිදුරටත් ප්‍රකාශ කොට ඇත.