ජපන් ජාතිකයෙකුට හොංකොං වෙත ඇතුළුවීම තහනම් කෙරේ

ජපන් ජාතිකයෙකුට හොංකොං වෙත ඇතුළුවීම තහනම් කර ඇති පුවතක් වාර්තා වේ.

 

ඒ ඔහු වසර හතරකට පෙර රාජ්‍ය විරෝධී විරෝධතාකරුවන් දිරිගන්වන ලකුණක් සමඟ හොංකොංහි වීදිවල ගීත ගායනා කිරීම හේතුවෙනුයි.

 

36 හැවිරිදි මෙම පුද්ගලයා පෙරේදා (12) හොංකොං ජාත්‍යන්තර ගුවන් තොටුපළ වෙත පැමිණ ඇති අතර පැය තුනක පමණ කාලයක් බලධාරීන් ඔහුගෙන් ප්‍රශ්න කළ බවත් ඇතුළුවීම ප්‍රතික්ෂේප කළ බවත් වාර්තා වේ.

 

මෙම පුද්ගලයා 2015 සිට වසර පහක කාලයක් හොංකොං හි වීදිවල සහ වෙනත් තැන්වල "මිස්ටර් වොලී" නමින් ප්‍රසංග කර ඇත.

 

2019 සහ 2020 දී ඔහුගේ වීදි සංදර්ශන නීති විරෝධී බව බලධාරීන් ඔහුට පවසා ඇත.

 

2019 දී හොංකොං හි දැවැන්ත රාජ්‍ය විරෝධී විරෝධතා පැනනැඟුණු විට එම පුද්ගලයා හොංකොං වැසියන්ට දිරිගැන්වීමේ පණිවිඩයක් සහිත පුවරුවක් පෙන්වමින් සෑම දිනකම පාහේ වීදිවල ගීත ගායනා කර තිබේ.